Urdu poetry

mujhase milane ke vo karataa thaa bahaane kitane
ab guzaaregaa mere saath zamaane kitane
- Seemab Akbarabadi

aarazuu hai vafaa kare ko_ii
jii na chaahe to kyaa kare ko_ii
- Daag Dehlvi

jo kuchh kaho qubuul hai taqaraar kyaa karuu.N
sharmindaa ab tumhe.n sar-e-baazaar kyaa karuu.N

[qubuul = accept; taqaraar = argument; sar-e-baazaar = in public]
- Anwar Shaoor

sunaa hai Gair kii mahafil me.n tum na jaaoge
kaho to aaj sajaa luu.N Gariib-Khaane ko
- Qamar Jalalwi

vo to vo hai.n tumhe.n ho jaayegii ulfat mujhase
ek nazar tum meraa mahabuub-e-nazar to dekho
- Faiz Ahmed Faiz

yuu.N bichha.Danaa bhii bahut aasaa.N na thaa usase magar
jaate jaate us kaa vo mu.D ke dubaaraa dekhanaa
- Parveen Shakir

sharm samajhe tere TaGaaful ko
vaah! kyaa hoshiyaar ham bhii hai.n
- Daag Dehlvi

us ke dil pe bhii ka.Dii ishq me.n guzarii hogii
naam jis ne bhii muhabbat kaa sazaa rakhaa hai
- Hakim Nasir

go havaa-e-gulsitaa.N ne, mere dil kii laaj rakh lii
vo naqaab Khud uThaate, to kuchh aur baat hotii
- Aga Hashr

ai husn! ham ko hijr kii raato.n kaa Khauf kyaa
teraa Khayaal jaagegaa, soyaa kare.nge ham
- Jazbi

tere ishq kii intahaa chaahataa huu.N
merii saadagii dekh kyaa chaahataa huu.N
- Allama Iqbal

merii bezubaan aa.Nkho.n se gire hai.n cha.nd katare
vo samajh sake to aa.Nsuu na samajh sake to paanii
- Nazeer Banarsi

shab bhar to un kii yaad me.n taare ginaa kiye
taare-se din ko bhii nazar aaye.n to kyaa kare.n
- Akhtar Shirani

alfaaz kahaa.N se laauu.N chhale kii tapak ko samajhaauu.N
izahaar-e-muhabbat karate ho ehasaas-e-muhabbat kyaa jaano
- Raza Qureshi

ishq nahii.n hai tum ko mujhase sirf bahaane karatii ho
yuu.N hii bahaane qaayam rakhanaa tum mere mar jaane tak
- Unknown

dil ke Tuka.Do.n se terii yaad kii Khushbuu na ga_ii
buu-e-may baaqi hai TuuTe huye paimaane me.n
- Shamim Shahabadi

Gazalo.n ne vahii.n zulfo.n ke phailaa diye saaye
jin raaho.n pe dekhaa hai bahut dhuup ka.Dii hai
- Bashir Badr

apanaa kaam hai sirf mohabbat baaqii us kaa kaam
jab chaahe vo ruuThe ham se jab chaahe man jaaye
- Jameeluddin "Aali"

adaa-e-matlab-e-dil hamase siikh jaaye ko_ii
u.nhe.n sunaa hii diyaa haal daastaa.N kii tarah

[adaa = style; matlab = meaning; daastaa.N = story]

- Daag Dehlvi

ham labo.n se kah na paaye un se haal-e-dil kabhii
aur vo samajhe nahii.n ye Khaamoshii kyaa chiiz hai

terii nigah-e-mast ne maKhmuur kar diyaa
kyaa maikade ko jaauu.N tujhe dekhane ke baad

[maKhmuur = intoxicated]

- Saeed Shahidi

nashaa pilaake giraanaa to sab ko aataa hai
mazaa to jab hai ki girato.n ko thaam le saaqii

- Allama Iqbal

tuu jo ai zulf pareshaan rahaa karatii hai
kis ke uja.De hue dil me.n hai Thikaanaa teraa

- Daag Dehlvi

mehamaan banke aaye kisii roz agar vo shaKhs
us roz bin sajaaye meraa ghar sajaa lage

[mehamaan = guest; shaKhs = person]

- Qateel Shifai

baat chalii terii aa.Nkho.n se jaa pahu.Nchii paimaane tak
khii.nch rahii hai terii ulfat aaj mujhe maiKhaane tak
- Unknown

zaKhmo.n se badan gulazaar sahii par un ke shikastaa tiir giino
Khud tarakash vaale kah de.nge ye baazii kis ne haarii hai

[shikastaa tiir = arrows which did not reach their target]

- Ahmed Faraz

is me.n ko_ii shikavaa na shikaayat na gilaa hai
ye bhii ko_ii Khat hai ki muhabbat se bharaa hai
- Iftikhar Imam

Nita's urdu poetry page is a vast collection of about 1500 ghazals and nazms by 300 different poets. A must visit for every urdu poetry enthusiast.
Archives of urdu poetry is a collection of ghazals in urdu script.
Abhay's Ashiana is an attempt to cover as many aspects of urdu poetry as possible. Very nice!
Uma's ghazal page introduces the life and ghazals of many prominent poets.
Mehfil-e-mushaira is a collection of audio clips recited by poets themselves in several mushairas all over the world.
Hamid Syed's urdu poetry page is a small collection of ghazals and shers by some of the prominent poets.
Intekhaab-e-Kalaam is a nice urdu poetry page introducing the lives of poets. It also has many ash'aar sorted subject wise.
Urdu web page of Ali Chaudhary is a urdu poetry page in urdu. You will need to download the urdu font from urdu web
Ghazals of Mirza Ghalib is a collection of about 50 ghazals of Ghalib, many of which are available in Devnagari script.